Daily Archives: December 3rd, 2014

နော်ဝေဘုရင်ရန်ကုန်တက္ကသိုလ်မှာ မိန့်ခွန်းပြော

Norway King

Norway King

မြန်မာနိုင်ငံရဲ့ ပြုပြင်ပြောင်းလဲရေးကို အသိအမှတ်ပြုပေမဲ့ ငြိမ်းချမ်းရေးဖြစ်စဉ်တွေမှာတော့ စိန်ခေါ်အကဲစမ်းမှုတွေနဲ့ ရင်ဆိုင်ရဦးမယ် လို့  နော်ဝေဘုရင် Harald (ဟာဒါးလ်) က ဒီကနေ့ ရန်ကုန်တက္ကသိုလ် ဘွဲ့နှင်းသဘင်ခန်းမမှာ ပြုလုပ်တဲ့ အခမ်းအနားတွင်း ထည့်သွင်း   ပြောကြားခဲ့ပါတယ်။

ဒါ့အပြင် နော်ဝေ-မြန်မာ ဆက်ဆံရေးနဲ့ စီးပွားရေးဆိုင်ရာ ပူးပေါင်းဆောင်ရွက်မှုတွေ တိုးတက်လာဖို့ ဆောင်ရွက်သွားမယ်လို့   နော်ဝေ ဘုရင် က ကတိပြု ပြောကြားပါတယ်။ နော်ဝေဘုရင်ရဲ့ မြန်မာနိုင်ငံ ခရီးစဉ်အတွင်း ရန်ကုန်တက္ကသိုလ်မှာ ပြောကြားတဲ့ မိန့်ခွန်း အကြောင်း ကိုစည်သူက သတင်းပေးပို့ထားပါတယ်။

မြန်မာနိုင်ငံရဲ့ ဖွံ့ဖြိုးတိုးတက်ရေးအတွက် နော်ဝေနိုင်ငံဟာ ကာလကြာရှည်စွာ ပါဝင်ကူညီခဲ့သလို အနာဂတ်မှာလည်း မြန်မာနိုင်ငံရဲ့ ဖွံ့ဖြိုးရေး လုပ်ငန်းတွေမှာ ကူညီသွားဖို့ နော်ဝေဘုရင် Harald (ဟာဒါးလ်) က ပြောကြားခဲ့ပါတယ်။ ပြုပြင်ပြောင်းလဲရေးနဲ့ ငြိမ်းချမ်းရေး ဖြစ် စဉ်တွေရဲ့ စိန်ခေါ်မှုတွေကို သတိချပ်ဖို့ တိုက်တွန်းခဲ့ပါတယ်။

“အကူးအပြောင်းဖြစ်စဉ်မှာ ခင်ဗျားတို့ ရင်ဆိုင်ရမယ့် အခက်အခဲတွေကို ကျွန်တော်တို့ နားလည်သဘောပေါက်ပါတယ်။ ပွင့်လင်းမြင် သာ တဲ့   စီးပွားရေးစနစ်ကို ကူးပြောင်းရာမှာ ခင်ဗျားတို့ ကျော်လွှားရမယ့် အခက်အခဲ များစွာရှိပါလိမ့်မယ်။ ဆက်ပြီးတော့   ဖော်   ဆောင်နေ တဲ့ ငြိမ်းချမ်းရေး ဖြစ်စဉ်တွေမှာလည်း စိန်ခေါ်မှုတွေကို ရင်ဆိုင်ရဦးမှာပါ။ ရေရှည်တည်တန့်ခိုင်မာတဲ့ ငြိမ်းချမ်းရေးရယူ တည်ဆောက်တဲ့ ဖြစ်စဉ်မှာ အချိန်ယူရပါမယ်။”

ဒီမိုကရေစီ ပြည့်ဝတဲ့ နိုင်ငံတခုဖြစ်လာရေး မြန်မာပြည်သူတွေရဲ့ ကြိုးစားမှုကို အသိအမှတ်ပြု အားကျမိကြောင်း နော်ဝေဘုရင် Harald (ဟာဒါးလ်) က ရန်ကုန်တက္ကသိုလ်မှာ ပြောကြားတဲ့ မိန့်ခွန်းမှာ ပြောကြားခဲ့ပါတယ်။

“နော်ဝေးနိုင်ငံသားတွေရဲ့ ကိုယ်ပိုင်ရပိုင်ခွင့်တွေဖြစ်တဲ့ တန်းတူညီမျှမှု၊ လွတ်လပ်မှု၊ ငြိမ်းချမ်းမှု၊ ဒီမိုကရေစီ အစရှိတဲ့ တန်ဖိုးရှိတဲ့ အရာ   တွေ ကို ရယူဖို့ မြန်မာပြည်သူတွေက စိတ်အားထက်သန်စွာ ကြိုးပမ်းအားထုတ်နေတာကို ကျွန်တော်တို့ လေးစားမိပါတယ်။ ခက်ခဲ တဲ့ အတိတ်ကာလတွေကို မျှော်လင့်ချက်ရှိတဲ့ အနာဂတ်အဖြစ် ပြောင်းလဲဖို့ ကြိုးစားနေကြတာကိုလည်း ချီးကျူးပါတယ်။ ခင်ဗျား တို့ ရှေ့ဆက် လုပ်ဆောင်ရမယ့် ခက်ခဲတဲ့ ရှေ့လုပ်ငန်းစဉ်တွေမှာ အထောက်အကူပေးဖို့ ကျွန်တော်တို့ ဒီနေရာကို ရောက်နေ ရတာပါ။”

မြန်မာနိုင်ငံရဲ့ သဘာဝသယံဇာတတွေကို စနစ်တကျ စီမံခန့်ခွဲနိုင်ဖို့နဲ့ လူ့စွမ်းအား အရင်းအမြစ် ဖွံ့ဖြိုးလာရေး ဦးစားပေး ဆောင်ရွက် ဖို့ ကို လည်း တိုက်တွန်းခဲ့ပါတယ်။

“နော်ဝေနိုင်ငံဟာ ဆင်းရဲတဲ့ နိုင်ငံတခုဖြစ်ခဲ့ပါတယ်။ များပြားလှတဲ့ သဘာဝ သယံဇာတတွေကို သတိကြီးကြီးနဲ့ စီမံခန့်ခွဲနိုင်ခဲ့မှုကြောင့် ကျွန်တော်တို့ နော်ဝေပြည်သူတွေဟာ ကောင်းမွန်တဲ့ လူမှုဘ၀ကို ခံစားနေရပါပြီ။ အဓိကအားဖြင့် ပညာရေးနဲ့ ကျန်းမာရေး နယ်ပယ်   တွေမှာ ရင်းနှီးမြှုပ်နှံခဲ့ပြီးတော့ ကျွန်တော်တို့ရဲ့ လူ့အရင်းအမြစ်တွေကို ဖွံ့ဖြိုးတိုးတက်အောင် လုပ်နိုင်ခဲ့တာ ဖြစ်ပါတယ်။”

နော်ဝေဘုရင်ရဲ့ ရန်ကုန်တက္ကသိုလ် မိန့်ခွန်းဟာ အပြုသဘောဆောင်တဲ့ တိုက်တွန်းမှုတွေ ဖြစ်တယ်လို့ တက်ရောက်သူတွေက သုံးသပ် ပါ တယ်။ နော်ဝေအစိုးရရဲ့ မြန်မာအပေါ် အကူအညီပေးမှုတွေနဲ့ နော်ဝေဘုရင်ရဲ့ မြန်မာနိုင်ငံခရီးစဉ်အပေါ် မြန်မာပြည်သူ့ဖိုရမ် လုပ်ငန်း အဖွဲ့ အမှုဆောင် ဒါရိုက်တာ ကိုကျော်လင်းဦးက အခုလို သုံးသပ်ပါတယ်။

“လက်ရှိမှာ ကျနော်တို့ မြန်မာနိုင်ငံအနေနဲ့ကလည်း နိုင်ငံတကာ အကူအညီတွေက တော်တော်လေး လိုအပ်နေသေးတဲ့ အနေ အထား မျိုး   ဖြစ်နေတဲ့အခါကျတော့ ဒီနော်ဝေနိုင်ငံအနေနဲ့ ဒီလိုကူညီတဲ့ဟာက တော်တော်လေးကို အကျိုးရှိပါတယ်။   နောက်တခု ကတော့ ကျနော် ဒီနေ့ ဒီဘုရင်ကြီးရဲ့ မိန့်ခွန်းတခုမှာ ကျနော်တခု သတိပြုလိုက်မိတာကတော့ ဒီနော်ဝေဆိုတာကလည်း တချိန်တုန်းက အင်မတန် ဆင်းရဲတဲ့ နိုင်ငံပါပဲပေါ့နော်။ ကမ္ဘာပေါ်မှာ ဒီလို အခြေအနေကနေပြီးတော့မှ ကမ္ဘာ့အချမ်းသာဆုံး အလှူရှင်တိုင်းပြည် တခုဖြစ်အောင် သူတို့ ကြိုးစားရုန်းကန်ခဲ့ရတယ် ဆိုတဲ့ဟာကို တွေ့ရတဲ့အခါကျတော့ ကျနော်တို့ တိုင်းပြည်လည်း ဒီလို ကြိုးစားရုန်းကန် မှုတွေ အများကြီး လုပ် ရမယ်လို့ ကျနော် မြင်တယ်။ နောက်တခုကတော့ ဒီလို ကြိုးစားရုန်းကန်မှုတွေ အများကြီး လုပ်တဲ့နေရာမှာ   နော်ဝေလို တိုင်းပြည် မျိုးရဲ့ အကူအညီတွေ အများကြီး ကျနော်တို့ တိုင်းပြည်အတွက် လိုအပ်တယ်လို့ ထင်ပါတယ်။”

ယုံကြည်မှုတည်ဆောက်ခြင်းနဲ့ ငြိမ်းချမ်းရေး ရရှိရေးအတွက် ကြိုးစားခဲ့သူ ကရင်အမျိုးသား David Taw (ဒေးဗစ်တော) ကို အစွဲပြုပြီး David Taw ပညာသင်ဆု ရန်ပုံငွေတခုကို မတည်ထားကြောင်းလည်း ယနေ့မိန့်ခွန်းနဲ့ တပါတည်း ကြေညာခဲ့ပါ တယ်။   နော်ဝေးနိုင်ငံ က ထောက်ပံ့မယ့် David Taw ပညာသင်ဆုဟာ မြန်မာနိုင်ငံအနှံ့က သမိုင်းနဲ့ လူမှုရေး ဘာသာရပ်တွေမှာ ထူးချွန်ကြတဲ့   ကျောင်း သား   တွေ ကို ရွေးချယ် ထောက်ပံ့ပေးသွားမှာ ဖြစ်ပါတယ်။

နော်ဝေးဘုရင် Harald (ဟာဒါးလ်) နဲ့ မိဖုရား Sonja (ဆွန်ရာ) တို့ဟာ မနေ့က ဒီဇင်ဘာလ ၁ ရက်နေ့မှာ သမ္မတ ဦးသိန်းစိန်၊ အမျိုးသား ဒီမိုကရေစီအဖွဲ့ချုပ် ဥက္ကဌ ဒေါ်အောင်ဆန်းစုကြည်တို့နဲ့ နေပြည်တော်မှာ သီးသန့် တွေ့ဆုံခဲ့ပါတယ်။ ဒီဇင်ဘာလ ၁ ရက်ကနေ ၅ ရက်နေ့ အထိ ခရီးစဉ်အတွင်း ရန်ကုန်၊ မန္တလေး၊ နေပြည်တော်၊ ပုဂံတို့ကို လည်ပတ်ဖို့ရှိတဲ့အပြင် လူထုအခြေပြု အဖွဲ့အစည်းတွေ၊ စီးပွားရေးလုပ်ငန်းရှင်တွေနဲ့ တွေ့ဆုံဖို့ ရှိပါတယ်။

xxxxxxxxxxxxxxxxxxxxxxxxx

မြန်မာနိုင်ငံ မှကျောင်းသားကျောင်းသူ များအတွက်နော်ဝေ နိုင်ငံမှ David Taw လို့ အမည်ပေးထားတဲ့ ပညာသင်ဆုရံပုံငွေကို မတည် ထားကြောင်း ယနေ့ ရန်ကုန်တက္ကသိုလ် ဘွဲနှင်းသဘင် ခမ်းမမှာကျင်းပတဲ့ မိ်န့်ခွန်းဟောပြောပွဲမှာ နော်ဝေ နိုင်ငံပဉ္စမမြောက် ဘုရင် ဟယ် ရယ် ကကြေညာလိုက်ပါတယ်။

“မြန်မာနိုင်ငံရဲ့အနာဂတ်ဟာ ကျတော်နဲ့သက်တူရွယ်တူ သူတွေရဲ့လက်ထဲမှာမရှိပါဘူး။ မျုးဆက်သစ်လူငယ်များရဲ့ လက်ထဲမှာပဲရှိ ပါ တယ်။” ဘုရင်ဟယ်ရယ်က ပြောပါတယ်။

David Taw ဟာ ငြိမ်းချမ်းရေးအတွက် တသက်လုံးကြိုးစားခဲ့သူဖြစ်ပြီး မြန်မာနိုင်ငံ ကငြိမ်းချမ်းရေးကိုလိုလားပြီးငြိမ်းချမ်းရေး အတွက် အစဉ်တစိုက် ကြိုးစားအားထုတ် ဖို့ အခိုင်အမာ ဆုံးဖြတ်ချက်ချထားတဲ့ မည်သည့် ကျောင်းသားကျောင်းသူမဆို ပညာသင်ဆု ကိုလျောက် ထားနိုင်တယ် လို့ဘုရင်ဟယ်ရယ် ထည့်သွင်းပြောဆိုခဲ့ပါတယ်။

Author-နန်းလွင်
Photo- Myo Khine

အစ္စလာမ်ဟာငြိမ်းချမ်းရေးသာသနာ၊ကုရ်အာန်ဟာ ငြိမ်းချမ်းရေး ကျမ်းစာဟု ပုပ်ရဟန်း မင်းကြီးပြောကြား

တူရကီနိုင်ငံကို သုံးရက်ကြာလည်ပတ်ပြီးနောက် ခရီးစဉ်ရှင်းလင်းပွဲတွင် ပုပ်ရဟန်းမင်းကြီး ဖရန်စစ်က အစ္စလာမ်သည် ငြိမ်းချမ်းရေး သာသနာဖြစ်ကြောင်း အတည်ပြုပြောဆိုပြီး လူနည်းစု၏ ကျူးလွန်မှုအတွက် မွတ်စလင်အားလုံးအား တတန်းတစားတည်းထား အဆင့် သတ်မှတ်နေမှုများအား ပယ်ချလိုက်သည်။

“ကုရ်အာန်ဟာ ငြိမ်းချမ်းရေး ကျမ်းစာပါ၊ ဒါဟာ ငြိမ်းချမ်းရေး တမန်တော်နဲ့ဆိုင်တဲ့ စာအုပ်ပါ”ဟု ပုပ်ရဟန်းမင်းကြီးက ဒီဇင်ဘာလ ၁ ရက်နေ့တွင် ပြောကြားသည်။

၎င်း၏ တူရကီအလည်အပတ်ခရီးစဉ်အတွင်း သမ္မတ အာဒိုဂန်၊ ၀န်ကြီးချုပ် အဟ်မဒ်ဒေ့ဗ်တိုဂလူ၊ ဘာသာရေးဦးစီးဌာနက အကြီအကဲ မဟ်မဒ် ဂေါ်မတ်ဇ်တို့နှင့် တွေ့ဆုံခဲ့သည်။

၎င်းမှာ အစ္စတန်ဘူလ်မြို့က ဗလီပြာကြီးထဲသို့လည်း ၀င်ရောက်လေ့လာခဲ့ပြီး တူရကီ မုဖ်သီနှင့်အတူ ၀တ်ပြုဆုတောင်းခဲ့သည်။

တစ်စုံတစ်ဦးက အကြမ်းဖက်မှုကို လက်တုန့်ပြန်ရန်အတွက် အစ္စလာမ်ကို ဆန့်ကျင်ဒေါသထွက်နေခြင်းမှာ မှားယွင်းကြောင်း ပုပ်ရဆို သည်။

“ခရစ်ယာန်အားလုံးကို အခြေခံဝါဒီလို့ ပြောလို့မရသလိုပဲ (အစ္စလာမ်နဲ့ ပတ်သက်ရင်လည်း) ခင်ဗျား အဲဒီလို ပြောလို့ မရပါဘူး”

“အခြေခံဝါဒီဆိုတာ ဘာသာတရားတိုင်းမှာရှိတဲ့ သေးငယ်တဲ့ အုပ်စုတွေပါ” ဟု ပုပ်ကပြောသည်။

ပုပ်က မွတ်စလင်ခေါင်းဆောင်များအနေနှင့် အစ္စလာမ်နှင့် အကြမ်းဖက်မှု ဆက်စပ်နေသည်ဟူသော ပုံသေကားချ ယူဆချက်များကို ချိုးဖျက်ရန်အတွက် အကြမ်းဖက်များကို တကမ္ဘာလုံးအတိုင်းအတာဖြင့် ဆန့်ကျင်ရှုတ်ချရန် တိုက်တွန်းသွားခဲ့သည်။

“သမ္မတနဲ့တွေတော့ နိုင်ငံရေးမှာပဲဖြစ်ဖြစ် ဘာသာရေး၊ ပညာရေး မှာပဲဖြစ်ဖြစ် ဦးဆောင်နေတဲ့ မွတ်စလင်ခေါင်းဆောင်တွေဟာ အကြမ်း ဖက်မှုတွေကို ပြတ်ပြတ်သားသား ထုတ်ဖော်ပြောသင့်တယ်၊ ရှုတ်ချသင့်တယ်၊ ဒါမှသာ ကျန်တဲ့ မွတ်စလင်လူများစုကြီးကို ကူညီရာ ရောက်မယ်”ဟု ပုပ်က သတင်းထောက်များကို ပြောကြားသည်။

အသက် ၇၇ နှစ်အရွယ်ရှိ ပုပ်ရဟန်းမင်းကြီး ပွန်တစ်ဖ်သည် တူရကီနိုင်ငံသို့ စတုတ္ထမြောက် ရောက်ရှိလာသော ပုပ်ရဟန်းမင်းကြီး လည်းဖြစ်သည်။
၂၀၀၆ ခုနှစ် နိုဝင်ဘာတွင် ပုပ်ရဟန်းမင်းကြီးဘီနီဒစ် XVI က တူရကီနိုင်ငံသို့ လည်ပတ်ခဲ့ပြီး အစ္စတန်ဘူးလ်က ဗလီပြာကြီးတွင်လည်း အလားတူ ဆုတောင်းမှုများ ပြုလုပ်ခဲ့သည်။

Source : Onislam
ဘာသာပြန် – စိုင်ဖုလ္လာဟ်(Myanmar Muslim Media)

ကိုးကွယ်ရာဘာသာကူးပြောင်းခြင်းဆိုင်ရာ ဥပဒေကြမ်းကို ဝေဖန်မှုများရှိနေ

ဘာသာရေး, ဥပဒေ

ပြည်ထောင်စု အစိုးရအဖွဲ့က လွှတ်တော်သို့ တင်သွင်းလိုက်သည့် ကိုးကွယ်ရာဘာသာ ကူးပြောင်းခြင်းဆိုင်ရာ ဥပဒေသည် လွတ်လပ် စွာ ကိုးကွယ်ခွင့်နှင့် လူ့အခွင့်အရေးကို ထိခိုက်နိုင်ကြောင်း ဝေဖန်ပြောဆိုမှုများ ထွက်ပေါ်နေသည်။

ကိုးကွယ်ရာ ဘာသာ ကူးပြောင်းခြင်းဆိုင်ရာ ဥပဒေကြမ်းသည် နိုင်ငံသားတိုင်း ကိုးကွယ်ရာဘာသာကို လွတ်လပ်စွာ ရွေးချယ်ခွင့် ရရှိစေ ရန်နှင့် ကိုးကွယ်ရာဘာသာ ကူးပြောင်းခြင်းပြုရာတွင် ပွင့်လင်းမြင်သာပြီး စနစ်တကျရှိစေရန်အတွက် ပြဋ္ဌာန်းခြင်းဖြစ်သည်ဟု ဒီဇင်ဘာ ၁ ရက် ထုတ် အစိုးရသတင်းစာများက ဖော်ပြထားသည်။

“ဒီဥပဒေကြမ်း ထွက်လာတာဟာ မသမာသူ လူတစုအတွက် အကြောင်းပြချက်တွေ ရလာဦးမှာပေါ့၊ ဒါတွေ ထွက်လာလို့လည်း တိုင်းပြည်မှာ ဖြစ်နေတဲ့ လူမျိုးရေး၊ ဘာသာရေး အကြမ်းဖက်မှု ပြဿနာတွေ ပြေလည် သွားလိမ့်မယ်လို့ လုံးဝ မထင်ဘူး။ ဘာသာပေါင်းစုံနေ တဲ့ ဒီနိုင်ငံမှာ ဘာသာပြောင်းတယ်၊ မပြောင်းဘူးဆိုတာ ကိုယ်ပိုင် လွတ်လပ်ခွင့်ပဲ” ဟု ရန်ကုန်မြို့ရှိ ဟိန္ဒူဘုရားကျောင်းတကျောင်း၏   ဂေါပကဖြစ်သူ ဦးခင်အောင်က ဧရာဝတီသို့ ပြောသည်။

အဘက်ဘက်မှ လိုအပ်ချက်များစွာ ရှိနေသည့် ပြည်တွင်း နိုင်ငံရေး၊ စီးပွားရေး၊ လူမှုရေးကိစ္စများကို အကောင်အထည် ဖော်ရန် မကြိုးပမ်းဘဲ ယင်းဥပဒေကြမ်းကို ပြဋ္ဌာန်းလိုသည့် အစိုးရအပေါ် ဘာသာရေးကို နိုင်ငံရေး လှည့်ကွက်တခုအဖြစ် အသုံးချနေသည်ဟု ထင်မြင်မိကြောင်း လူ့အခွင့်အရေး လှုပ်ရှားသူများကလည်း သုံးသပ်ပြောဆိုသည်။

“စိတ်ပိုင်းဆိုင်ရာ ယုံကြည်မှုကို သတ်မှတ်မှုတခု အနေနဲ့ လုပ်မယ်ဆိုတာကို သိပ်သဘောမကျဘူး၊ ငြိမ်းချမ်းရေး၊ တိုင်းရင်းသားအရေး စတဲ့ အရေးကြီးကိစ္စတွေ အများကြီး ရှိနေတဲ့အချိန်မှာ ဒီဥပဒေကြမ်း တင်လိုက်တဲ့အပေါ် ကျနော်တို့တွေ သံသယ အများကြီးရှိနေတယ်။ ဒီအပေါ် မူတည်ပြီး ဥပဒေကို လက်ခံမယ်၊ လက်မခံဘူးဆိုတဲ့ အဖွဲ့တွေ ကွဲသွားပြီး အခြားကိစ္စတွေမှာ အာရုံစိုက်မယ့် အားတွေ   လျော့သွားတာမျိုး ဖြစ်နိုင်တာကြောင့် ဒီဥပဒေကြမ်းအပေါ် သဘောမကျဘူး” ဟု လူ့အခွင့်အရေးဆိုင်ရာ လှုပ်ရှားဆောင် ရွက်နေ သည့် Equality Myanmar မှ ဒါရိုက်တာ ဦးအောင်မျိုးမင်းက သုံးသပ်သည်။

ဒီဇင်ဘာ ၁ ရက်က ထုတ်ပြန်သည့် ဥပဒေကြမ်းတွင် ကိုးကွယ်မှုဘာသာ ကူးပြောင်းမှု ပြုလုပ်နိုင်ရန် မြို့နယ်အသီးသီးတွင် စိစစ်မှတ်ပုံ တင်ရေး အဖွဲ့အဖြစ် မြို့နယ်သာသနာရေးမှူး၊ လူဝင်မှုကြီးကြပ်ရေးနှင့် အမျိုးသားမှတ်ပုံတင်ရေး ဦးစီးဌာန၊ အထွေထွေ အုပ်ချုပ်ရေး ဦးစီး ဌာနနှင့်  အဆိုပါဌာနက ရွေးချယ်ထားသည့် ကိုးကွယ်ရာ ဘာသာအသီးသီးနှင့် သက်ဆိုင်သည့် မြို့မိမြို့ဖ ၄ ဦး၊ ပညာရေးဝန် ထမ်းနှင့် အမျိုးသမီးရေးရာအဖွဲ့ ပါဝင်ဖွဲ့စည်းမည်ဟု ပါဝင်သည်။

ဥပဒေကြမ်းတွင် ပါဝင်နေသည့် နည်းဥပဒေပိုင်းဆိုင်ရာ ကိစ္စများနှင့် မှတ်ပုံတင်ရန် ဆောင်ရွက်ရမည့် ကိစ္စများတွင် အစိုးရနှင့် အရပ်ဘက်ပိုင်းဆိုင်ရာ ပုဂ္ဂိုလ်များ အများဆုံး ပါဝင်စီမံမည်ဖြစ်၍ ဗဟိုချုပ်ကိုင်မှု များပြားနေကြောင်း၊ ဘာသာပြောင်းလဲရသည့် ရည်ရွယ်ချက်ကို မေးမြန်းသည့် အချက်မှာလည်း လူတဦးချင်းစီ၏ ပုဂ္ဂိုလ်ရေးကိစ္စ ဖြစ်သည့်အတွက် မမေးသင့်ကြောင်းနှင့် လက်ရှိ လွှတ်တော်တင်ထားသည့် ဥပဒေကြမ်းများသည် ရည်ရွယ်ချက် မကောင်းပါက ယင်းကို အစပြုကာ နောက်ပိုင်းတွင် တင်းကျပ်သည့် နည်းဥပဒေများ ပေါ်ပေါက်လာနိုင်သေးကြောင်း ဦးအောင်မျိုးမင်းက ထောက်ပြပြောဆိုသည်။

ပစ္စုပ္ပန် ကမ္မဝါဒ မိုးပြာဂိုဏ်း အဖွဲ့ဝင်ဖြစ်သူ ဦးကျော်ကျော်ထွန်းက အစိုးရသည် လူထုအပေါ် ကန့်သတ်မှုများ ပြုလုပ်နေသည်ဟု ထင်ကြောင်း၊ မည်သည့် ဘာသာကိုမဆို လွတ်လပ်စွာ ကိုးကွယ်ခွင့်ရှိသည်ဟု ယူဆကြောင်း ပြောသည်။

“သက်သက်မဲ့ အလုပ်မရှိ၊ အလုပ်ရှာ လုပ်နေသလို ဖြစ်နေတယ်၊ ဘာသာရေးဆိုတာ ဘယ်သူမဆို လွတ်လပ်စွာ ကိုးကွယ် ခွင့်ရှိနေ တာပဲ။ လူတွေအပေါ် ကန့်သတ်ချုပ်ချယ်နေသလို ဖြစ်နေပြီ” ဟု ၎င်းက သုံးသပ်သည်။

ကိုးကွယ်ရာဘာသာ ကူးပြောင်းခြင်းဆိုင်ရာ ဥပဒေကြမ်းတွင် တားမြစ်ချက်၊ ပြစ်ဒဏ်အပါအဝင် အခန်း ၆ ခန်းနှင့် ပုဒ်မ ၂၇ ခု ပါဝင်သည်။ ဥပဒေကြမ်းပါ အချက်အလက်များအရ မည်သူမျှ မည်သည့်ဘာသာ သာသနာကိုမဆို စော်ကားရန်၊ အကြည်ညိုပျက်စေရန် သို့မဟုတ် အလွဲသုံးစားပြုရန် အကြံဖြင့် ကိုးကွယ်ရာဘာသာ ကူးပြောင်းခြင်း မပြုရ၊ ကြွေးမြီဖြင့် နှောင်ဖွဲ့ခိုင်းစေခြင်း၊ သွေးဆောင်ခြင်း၊ ခြိမ်းခြောက်ခြင်း၊ မလျော်သြဇာသုံးခြင်းနှင့် အနိုင်အထက်ပြုခြင်း မပြုရ၊ ကိုးကွယ်ရာဘာသာ ကူးပြောင်းခြင်းကို ဟန့်တားခြင်း၊ ပိတ်ပင်ခြင်း သို့မဟုတ် နှောင့်ယှက်ခြင်းမပြုရဟု တားမြစ်ထားသည်။

ယင်းအချက်အလက်များကို ဖောက်ဖျက်ကျူးလွန်ပါက ပြစ်ဒဏ်အလိုက် ထောင်ဒဏ် ခြောက်လ မှ ၂ နှစ်၊ ငွေဒဏ် ကျပ် ၅ သောင်းမှ ၂ သိန်းအထိ လည်းကောင်း ချမှတ်မည်ဖြစ်ပြီး ထပ်မံကျူးလွန်သော ပြစ်မှုအတွက်လည်း အမြင့်ဆုံးပြစ်ဒဏ် ချမှတ်ခြင်းခံရ  မည်ဟု   ဖော်ပြ ထား သည်။

“လွတ်လပ်စွာ ကိုးကွယ်ခွင့် ပေးတယ်ဆိုကတည်းက ဘာမှ ပြောစရာအကြောင်း မရှိဘူး။ ဒီဥပဒေကို ထွက်လာဖို့ကို မလိုတာ။ ဘာသာကူးပြောင်းခြင်းဆိုတာ လူတယောက်ရဲ့ လွတ်လပ်ခွင့်ပဲ။ ကျနော်တို့ဘက်ကတော့ ဒီဥပဒေအပေါ် သိပ်လက်ခံချင်တဲ့ စိတ်တော့ မရှိဘူး။ ဥပဒေပေါ်လာလို့လည်း ငြိမ်းချမ်းပြီး အေးချမ်းသွားမှာ မဟုတ်ဘူး၊ ကိုးကွယ်ရာ ဘာသာတွေက ရှိပြီးပြီ။ အဲဒီအပေါ်မှာ ကန့်ကွက်နေ၊ ရှုတ်ချနေတယ်ဆိုရင်တော့ တိုင်းပြည်က ဘယ်လိုမှ အေးချမ်းလာစရာ မရှိဘူး” ဟု မန္တလေးမြို့၊ ခရစ်ယာန် အသင်းတော် များကောင်စီမှ သိက္ခာတော်ရ ဆရာတော် ဦးဇော်ဝင်းအောင်က ဧရာဝတီသို့ ပြောသည်။

ပြည်ထောင်စု အစိုးရအဖွဲ့က ကိုးကွယ်ရာဘာသာ ကူးပြောင်းခြင်းဆိုင်ရာ ဥပဒေကြမ်း အပါအဝင် တလင်တမယားစနစ် ကျင့်သုံးရေး ဥပဒေကြမ်း၊ မြန်မာဗုဒ္ဓဘာသာဝင် မိန်းမများ အထူးထိမ်းမြားခြင်းဆိုင်ရာ ဥပဒေကြမ်းနှင့် လူဦးရေ တိုးပွားနှုန်း ထိန်းညှိခြင်းဆိုင်ရာ ကျန်းမာရေးစောင့်ရှောက်မှု ဥပဒေကြမ်းကိုလည်း လွှတ်တော်သို့ တင်ပြထားပြီးဖြစ်ကြောင်း သိရသည်။

“အင်အားများသူတွေက အာဏာတည်တံ့ရေးနဲ့ အကျိုးစီးပွားအတွက် လုပ်နေတယ်လို့ သုံးသပ်တယ်၊ လူမျိုးရေး ဘာသာရေးအပေါ်မှာ အသုံးချတာ လုံးဝလက်မခံဘူး။ ဘာသာခြားတွေ အပေါ်မှာတော့ စိတ်အနှောက်အယှက် ဖြစ်စရာတွေချည်းပဲလေ။ ပစ်မှတ်ထားပြီး လုပ်နေတယ်ဆိုတာ အများစုက သိကြပါတယ်။ ဘာသာအချင်းချင်း၊ လူမျိုးအချင်းချင်းကြားမှာ နားလည်ယုံကြည်မှု တည်ဆောက်ရမယ့်အချိန်မှာ နားလည်မှုလွဲမယ့်ကိစ္စတွေ လုံးဝမဖြစ်သင့်ဘူး” ဟု ငြိမ်းချမ်းမှု တည်ဆောက်ရေးကွန်ရက်မှ မူဝါဒရေးရာ အကြံပေး ဦးထွန်းကြည် (နိုင်ငံရေး အကျဉ်းသားဟောင်း) က ပြောဆိုသည်။

ရှေ့နေ ဦးအေးပိုင်ကမူ “ဒီ ဥပဒေကြမ်း ထွက်လာတာကို မူအားဖြင့်တော့ သဘောတူပါတယ်။ ဒါက ဘာသာတခုနဲ့တခု အကြားမှာ ပြဿနာ မတက်အောင် စည်းကမ်း သတ်မှတ်လိုက်တဲ့သဘော ဖြစ်တယ်။ ဥပဒေကြောင်းအရတော့ အရေးယူမှုအပိုင်းနဲ့ ဘာသာကူးပြောင်းမှုမှာ သက်သေခံလက်မှတ် ထုတ်ပေးတဲ့အပိုင်းမှာ အားနည်းနေသေးတာတွေက ပြင်ရမယ့်အချက်တွေ ဖြစ်ပေမယ့် ဒီဥပဒေက တကယ် လိုအပ်ပါတယ်” ဟု သုံးသပ်သည်။

ယမန်နှစ်က မန္တလေးမြို့၊ မစိုးရိမ်တိုက်သစ်ကျောင်းမှ ဆရာတော် ဦးဝီရသူက “မျိုးစောင့်ဥပဒေ” ဟု ခေါ်သည့် ထိမ်းမြား လက်ထပ်ခြင်း ဆိုင်ရာ ဥပဒေမူကြမ်းကို ဖြန့်ဝေခဲ့စဉ်ကလည်း လူ့အခွင့်အရေး လှုပ်ရှားဆောင်ရွက်သူများနှင့် အဖွဲ့အစည်း အများ အပြား၏ ကန့်ကွက် မှု၊ ဝေဖန်မှုများစွာ ထွက်ပေါ်ခဲ့သေးသည်။